Eg ser på alle bloggane med dagens sminke, dagens outfit, hairextensions og gud veit kva, bles og tenker herregud kor vi øydelegg ungdommen vår. Så går eg forbi heilfigurspegelen i gangen, ser eit bustete formlaust hår, rynker og render i heile trynet, posar på størrelse med søppelsekkar under (og over) auga, hud som slaknar i elastisitet for kvar time. Alle andre på min alder (40+) ser jo betre og yngre ut enn meg? Korleis har det seg? Eg er i medium aktivitet kvar veke, oversolar meg ikkje, røyker ikkje. Til og med søstrene mine, som er begge er eldre enn meg ser betre ut enn meg! Og vi deler no tross alt same genene.
Er det no berre ungdommen vi øydelegg? Er eg verkeleg så mykje betre enn desse "rosa" bloggarane som berre tenker på dei 40 laga med maskara dei MÅ ha på i dei rette klumpelaga, og berre MÅ finne den rette "posen" før bilete kan takast. Eg har sjølv stadig færre bilete som går gjennom sensuren for publisering på facebook. Heilfigur kan du berre gløyme. Eg ser jo ut som ei middelaldrande (!) kjerring! Og kjem du nærare - syner rynker, fuglehals og leverflekker i trynet for mykje. Då legg eg heller ut blinkskotet frå i fjor eller det for 10 år sidan.
Vi var på Galghøpiggen med spreke ungar forrige veke. Det var så stygt veir at det ikkje var råd å få nokon andre til å ta gruppebilete av oss, dei sat nemleg inne foran ovnen å varma seg i skodda. Så biletet måtte eg ta sjølv. Når 5 stk skal skvisast inn i ramma, og eg held kamera, så må eg jo komme i front. Men dobbelhake, bossekkar og dalsøkk! Kva er viktigast - prestasjonar eller utsjånad? Eg er jo vaksen, så sjølvsagt er utsjånaden uviktig. Forfengeleg ?? Eg??? Nei, er vaksen eg. Det er ungdommen som er slik.... Ikkje eg!!
Ingen kommentarer :
Legg inn en kommentar